Tokante e proyekto

Etnobotánika ta e estudio di e relashon entre mata i hende. E ta enserá konosementu di klasifikashon di mata, kultivashon i uso práktiko di mata i yerba komo: alimento, medisina, ritual i material tradishonal den kultura di hende. E website di Curvital ta kontené dato etnobotániko di flora di Kòrsou ta mes diverso ku nos kultura. 

Mas informashon

Nos a haña influensia di kasi henter mundu. Promé ku nos a konosé supermerkado i botika, ta ku yerba i mata den naturalesa nos antepasadonan por a kuida nan mes. Den e tempu ayá, kulturalmente tabata e norma ku hende tabata produsí nan mes kuminda i traha remedi for di mata i yerba den naturalesa òf ku nan mes a planta.

E strañeronan ku a imigrá pa Kòrsou, no tabata diferente den esaki. Nan a trese simia i mata for di nan pais di orígen i a inkorporá nan den e medio ambiente di Kòrsou pa nan uso personal i Asina, konservá parti di nan kultura den e ambiente natural di Kòrsou. Si studia naturalesa di Kòrsou, lo por identifiká diferente di e sortonan di mata ku a yega aki for di otro pais i lo por komprondé e influensia ku nan tabatin riba kultura di Kòrsou.

E Retonan

PÈRDIDA DI KONOSEMENTU I SIEGUEDAT PA MATA

Mata ta fundamental pa eksistensia di tur loke tin bida na mundu. Por solushoná e E retonan di mas grandi ku mundu ta konfrontá awendia, inkluso seguridat di alimento, medisina, kambio ambiental i maneho di mal uso di rekurso natural i kon deshasí di shushi, ku aplikashon di konosementu di mata i naturalesa.
Durante di aña, adelanto den teknologia moderno a fasilitá kasi tur aspekto di nos bida diario, konsekuentemente a baha e nesesidat di ser humano pa ta informá tokante uso mata i yerba pa sobrebibensia. Ku otro palabra Humanidat a deskonektá for di naturalesa.

Hende tin e tendensia di mira mata komo un esenario di bida, parti di un dekorashon, i ta inkapas di rekonosé nan mes den nan ambiente. E fenómeno mundial akí ta konosí komo “Sieguedat pa mata”. “Sieguedat pa mata” ta resultá den un sintimentu di poko apresio pa mata i ta limitá e interes públiko pa e siensia di mata, kultivashon i konservashon. Debí na e falta di interes, ku tempu, eventualmente e informashon tokante mata lo por bai pèrdí.

DATO PLAMÁ

Gran parti di informashon tokante etnobotániko Kòrsou ya ta dokumentá pero ainda tin mas pa deskubrí. Informashon básiko di mata ta fásil pa haña. Sinembargo, e informashon aki den mayoria di kaso, ta plamá aki aya den buki, literatura sientífiko, artíkulo etc. Ademas no ta tur informashon ta disponibel di forma digital. Loke ta hasi difísil pa por identifiká i komprondé uso práktiko di e matanan.

Meta

TUR DATO UN KAMINDA

Meta di e website di Curvital ta pa kompilá tur dato etnobotániko di Kòrsou ku ta plamá aki aya i forma un banko di dato ku un forma di búskeda ekstenso, unda lo ta posibel pa por ehèmpel, buska tur mata na Kòrsou ku ta saka flor hel ku tin uso medisinal.

INFORMASHON AKTUALISÁ

Lo aktualisá e base di dato di Curvital periódikamente segun e normanan di Kew.

E normanan akí ta simpel i fásil pa e usadó, di manera ku un usuario por yuda ku atkisishon di konosementu, kolektá i distribuishon di dato. Informashon den e base di dato lo ta aksesibel pa tur hende. Ademas, e base di dato ta kontené un formulario pa e usadó por agregá informashon adishonal.

KONSERVASHON DI KONOSEMENTU I SABIDURIA

Tur hende por kompartí informashon riba e base di dato ora usa e opshon “añadí dato”. Por ehèmpel, ñetu por kompartí informashon di mata ku nan a optené for di kuenta i historia ku nan a skucha di nan wela òf tawela. Lo analisá i evaluá tur informashon riba e base di dato usando literatura di otro eksperto riba e tereno, pa sigurá ku e informashon kompartí ta konfiabel. Di e manera aki, lo sigui amplia e informashon balioso i konfiabel tokante mata na Kòrsou.

Konosé e ekipo

  • Tradusí pa:

Developed by CCloud Media